नेपाल आयल निगमले काठमाडौं उपत्यकाका ग्यास बिक्रेतालाई घरायसी उपभोक्तालाई प्राथमिकता दिन आग्रह गरेको छ।
निगमले बुधबार ग्यास बिक्रेता तथा उद्योगीका प्रतिनिधिसँग गरेको छलफलमा घरायसी प्रयोजनका लागि ग्यास खरिद गर्ने उपभोक्तालाई पहिलो प्राथमिकता दिन आग्रह गरेको हो।
अहिले विभिन्न स्थानमा पहिरोका कारण सडक अवरूद्ध छन्। यस्तो अवस्थामा ठूला गाडीमार्फत ग्यास ढुवानी गर्न समस्या भइरहेको निगमले जनाएको छ।
घरायसी उपभोक्तालाई प्राथमिकता दिन आग्रह गरिए पनि औद्योगिक प्रयोजनका लागि ग्यास बिक्रीमा रोक नलगाइएको निगमले स्पष्ट पारेको छ।
‘हामीले एउटा मात्रै सिलिन्डर किन्ने, घरायसी प्रयोजनमा प्रयोग गर्ने उपभोक्तालाई प्राथमिकता दिन भनेका हौँ। उहाँहरूलाई ग्यासको अभाव हुनु भएन,’ नेपाल आयल निगमका कार्यकारी निर्देशक सीए नगेन्द्र साहले भने, ‘एउटा व्यक्ति हेटौंडाबाट आफ्नै साधनमा ग्यास ल्याउन सक्दैन। त्यसैले उहाँहरूलाई प्राथमिकता दिएका हौँ।’
औद्योगिक प्रयोजनका लागि आवश्यक ग्यास हेटौंडा वा नजिकका अन्य क्षेत्रबाट ल्याउन सकिने उनले बताए।
साहका अनुसार अहिले नेपालमा ग्यासको आपूर्तिमा कुनै समस्या छैन। पृथ्वी राजमार्ग अवरूद्ध हुँदा ठूलो बुलेटमार्फत ग्यास ढुवानी गर्न मात्रै समस्या भएको हो।
त्यसैले अहिले सिलिन्डरमा ग्यास भरेर काठमाडौं उपत्यकामा आपूर्ति भइरहेको उनले जानकारी दिए।
-ink-1786874270.jpeg)
